„Dat Leven un Wark vun Neefeller Seilschipperfomiljen“.
4. Plattdüütsch Möhlensnack in’t Möhlenmuseum Mosborg.
De Seilschippfohrt in Oolland is dat Thema bi’n 4. Plattdüütsch Möhlensnack an’n Freedag, den 26. Juli, nomiddoogs vun Klock dree bit Klock fief in’t Mühlenmuseum Moisburg,
Auf dem Damm 10. Schrieversche un Vertellersche Monika Genz ut Mosborg leest un vertellt op Platt ut dat „Leven un Wark vun Neefeller Seilschipperfomiljen“. Bi Kaffe, Koken un Klöönsnack modereert Dr. Heinz Harms un Perf. Dr. Rolf Wiese, so as jümmer beslogen un spaßig den Nomiddag. Bit to’n Enn vun’n Oktober löppt de Möhlensnack jeden letzten Freedag in’n Moond. De Intritt köst nix.
Monika Genz leest ut ehr Book „Der Baum Neuenfelde“ intressante Geschichten vun de Neefeller Seilschipperfomiljen Bartels, Pien un Witt. „Disse waaghalsigen un driesten Schippers versöchden ünner leegste un armste Ümstännen in Gang to komen. Mit sure Obst-, Törf- un Muschelturen hebbt se jümehr Broot verdeent“, vertellt Monika Genz. „Männicheen is dorbi to Riekdoom un ihren komen. Annere hebbt dat, wat se suer wunnen hebbt, wedder verloren. De Minschen stoht in de Mitt vun de Vertellens vun Monika Genz. Se wiest, wo de grote Politik oder Vörfallen ut de Region (Natuurkatastrophen, Kriegen, Tieden ünner frömde Soldoten) in dat Leven un dat Schicksol vun de gemenen Lüüd in Neefeld un Oolland ingrepen hebbt.
Monika Genz is 1942 in Hamborg-Neefeld op de Welt komen. Se is mit de Vertellens vun ehr Mudder un Grootmudder opwussen. Öber vele Johren hett se Levensgeschichten un Vertellens ut de Gegend opschreven, vörderhand in de „Neuenfelder Blätter“. 2010 hett se dat in dat Book „Der Baum Neuenfelde“ tosomenfoot. Op 730 Sieden mit mihr as 900 Biller vertellt Monika Genz kregel un kloor vun Fomiljen, Karken, Dieken, Kriegen, groten Unglücken un Schicksalen, siet dat Dörp 1059 to’n eersten Mool nöömt worrn is. Se is dorbi de Geschichte vun enkelte Lüüd, vun Fomiljen mit Levensgeschichten över Johrhunnerten, vun Firmen un Institutschonen nogohn. Dat Book „Der Baum Neuenfelde“ is för 55 Euro bi Monika Genz (Tel. 04165 6933) oder ünner info@der-baum-neuenfelde.de to hebben.
Bi jeden Plattdüütsch Möhlensnack steiht en anner Thema in de Mitt – Soken ut uns Gegend, de een noch nich kinnt, Geschichte, Literatuur un vele annere Soken. Dr. Heinz Harms ut Hulnst, twete Vörsitter vun’n Vereen För Platt e.V., un Perf. Dr. Rolf Wiese kinnt de ole Regionoolsprook nipp un nau. Se modereert de Nomiddoog för all Lüüd, de giern mol wedder platt snacken wüllt.
Plattdüütsch oder Nedderdüütsch wöör de eerste Sprook in uns Gegend. Aktuell snackt so üm un bi 14 Perzent vun de Noorddüütschen noch Platt. Disse Sprook is estemeert in’n Sinn vun de europääsch Charta för Regionool- un Minnerheitensproken. Man dat Intress an Plattdüütsch warrt egolweg grötter: Leeswettstrieden, Schoolünnericht un Oortsschiller mit plattdüütsch Oortsnooms bringt de Sprook jümmer mihr in’n Alldag torüch. De Landkreis Horborg betohlt tohoop mit den Hölpervereen vun dat Butenmuseum an’n Kiekebarg nu de Steed vun en Plattdüütsch-Koordinatorsche. Se will dat Wark vun de plattdüütsch Koppels in de Gegend mitenanner verknütten un noch mihr Lüüd för Plattdüütsch winnen.