„All de goden Gaben!“
Plattdeutsche Kolumne von Uwe Hansen
Erntedank – dat is een van de öllsten Feste de wü kennt. Öber veele Generationen hebbt uns Vöröllern dormit för dat dankt, wat de Bibel unser „däglich Brot“ nömt. Siet dörtig Joahr smückt de Hamborger Bäckerinnung to’n Erntedank den Hamborger Michel festlich mit een groote Erntekroon, Brot vun alle Sorten un vuscheedene Lebensmittel ut. Un solang de Bäcker noch een eegen Chor bilden kunn, hebbt se bi düt Fest ok sungen.
Man all siet een poar Joahrn harrn se sük Vertärkung dörch „De Estetaler“ ut Hollenstedt söcht. Un nu, siet de Bäckersänger ganz opgeven müssen, is ok de Finkwarder Leedertafel Harmonie mit dorbi. Keen Wunner – is doch jümmer Baas, Jan Körner, de „Finkwarder Bäcker“ ok Innnungsmeester vun alle Hamborger Bäcker. Un vun wegen de Tradititschoon hebbt sük natürlich alle Sänger ok giern mit Bäckerjacken utstaffeert.
Nu all dat tweete Mal würt an’n iersten Sünndag in’n Oktober so wiet. Erntedankfest in uns Hamborger Hauptkark, in uns Michel! Un dütmol babento noch: De Lüüd vun Bibel TV. Mit Kameras un Mikros in een Livesendung, de in ganz Düütschland un weltwiet in’t Internet to sehn wür!
Mit Leeder op Hoch un Platt, ober ok mit Leonhard Cohens berühmtes „Halleluja“ in ingelsch kun‘n de Chöre un jümmere Solisten, ünner dat Leit van Ralf Lehnert un Peter Schuldt de veelen hunnert Gottesdeenst-Beseuker begeistern. Öber düsse Publikums-Reaktschoon hett jedenfalls Hauptpastor Röder snackt, as he sük bi de Chöre noch eenmol un sülms ok vull Loov, perseunlich bedankt hett. Un de Sänger freit sük all nu op dat tokamen Joahr. Erntedank in’n Michel, dat wardt een fasten Termin in jümmer Programm.